حيدري، نذير حسين: حڪيم نظير حسين حيدري ولد غلام علي خواجه، 14 مئي 1941ع تي نندي، ضلعي بدين ۾ ڄائو. هي لاڙ جو بهترين صحافي، اديب، عالم ۽ مفڪر هو. هن جا وڏا آغاخاني خواجا هئا، جيڪي بعد ۾ جعفري طريقي ۾ داخل ٿيا. سندس والد کلن جو وڏو واپاري هو. هيءُ شروعات ۾ لوڪل بورڊ ۾ منشي مقرر ٿيو. هن جي وقت ۾ بدين اندر پيرن ۽ ميرن جو وڏو اثر رسوخ هو. لاڙ ۾ پاڻيءَ جي ڍنڍن تي مير، پير، وزير توڙي منشي شڪار ۽ عياشين لاءِ ايندا هئا. ساڳئي وقت اتي جي مسڪين هارين، پورهيتن جي معاشي توڙي گهرو حالت تمام ابتر هئي. ناقص رياستي نظام هئڻ سبب جاگيردار ۽ زميندار هارين جو ڪمايل فصل ٻئي مٿا ٻهاري ويندا هئا. هن اهڙين ناانصافين سان بغاوت ڪري ڍڪ جو منشيگيري ترڪ ڪئي. هن 1938ع ۾ سياسي زندگيءَ جو آغاز مسلم ليگ کان ڪيو. بدين شهر ۾ هارين جي جماعت جو بنياد وڌائين. ٿوري ئي وقت اندر مجلسن توڙي سياسي اجتماعن ۾نالو ڪڍيائين. ڪيترا ڀيرا جيل به ويو. 1953ع ۾ ’اعلان حق‘ جي نالي سان اخبار جاري ڪيائين، جنهن ۾هارين پورهيتن سان ٿيندڙ ظلمن خلاف آواز اٿاريندو رهيو. هـيءُ اعـلـيٰ پايـي جـو ليکڪ به هو، هن هيٺيان ڪتاب تصنيف ڪيا: (1) ’دانجو‘، (2) ’جمهوريت يا تماشو‘، (3) ’منهنجي سياسي زندگيءَ جي آکاڻي‘، (4) ’خدا ۽ طبعزاد خطا‘ ۽ (5) ’دهريت ته دنيانيت سلامت‘ ۽ (6) ’ندا ۽ طبع زاد خدا‘ گهڻو مقبول ٿيا. سنڌ جو مشهور شاعر شمشير الحيدري سندس ڀائٽيو آهي. حڪيم نذير حسين 17 فبروري 1976ع تي بدين ۾ وفات ڪئي.
1941.05.14 عيسوي
حڪيم نظير حسين حيدري ولد غلام علي خواجه، 14 مئي 1941ع تي نندي، ضلعي بدين ۾ ڄائو.
1976.02.17 عيسوي
حڪيم نذير حسين 17 فبروري 1976ع تي بدين ۾ وفات ڪئي.